Трокай Борисов (1891-1943) "Быдтӥзы ке но - улэп"

Туннэ 1 толсуре 120 ар тырме удмурт калыклэн дано пиезлы Трофим Кузьмич Борисовлы.

Трофим Борисов Санкт-Петербургысь университетын дышетскыкуз

Трокай Борисовлэн улон сюресэз сярысь

Куд-ог фактъёс:

Трокай Борисов Казаньысь
технической училищеын

Трофим (Трокай) Кузьмич Борисов — публицист, политик, филолог, этнограф, эмъясь. Вордӥськиз 1-тӥ толсуре (вуж стилья 18-тӥ шуркынмонэ) 1891-тӥ арын Алнаш ёросысь Кизекгуртын. Дышетскиз гуртысьтыз земской школаын. Тодон-валанзэ муромытӥз на Алнаш черкогуртысь кык классъем школаын, Елабугаысь но  Казаньысь техникая училищеосын. Таин гинэ кӧтыз уг тыры — 1912-тӥ-1913-тӥ аръёсы пыре Санкт-Петербургысь историяя но кылосбуръя факультетэ. 1914-тӥ-1916-тӥ аръёсы визь песьтэрзэ узырмытэ ини Казаньысь университетысь медициная факультетын. Трокай Борисов луэ удмуртъёс пӧлысь нырысетӥез эмъясь, кудӥз басьтӥз вылӥ образование.

Трокай Борисов фронтын

1917-тӥ арын дышетсконзэ йылпумъямез бере Борисовез келяло Минской фронтэ. Отысь госпитальын эмъясь луыса ужа, дурбасьтэ большевикъёс пала. Совето властез кылдытонэ мыло-кыдо пыриське. 1918-тӥ арын ожмаське Украинаын, со арын ик бертэ дораз. Отын сое быръё Елабуга уездлэн исполкомысьтыз депутатъёслэн кенешсылэн тӧрое. Елабугаын большевикъёслэсь ячейказэс кылдытэ.

31-тӥ октябре 1918-тӥ арын Трофим Борисов кивалтэм улсын "Гудыри"  газетлэн нырысетӥ номерез потӥэ. Кичӧлтэмез улсын Алабгоын удмуртъёслэсь учительской семинария кылдэ (берло семинария Можгала выжтэмын вал, туннэ со – Можгаысь Трокай Борисов нимо педагогической колледж).

Трокай Борисов - Удмурт
комиссариатлэн воштӥсез

1919-тӥ арын Сарапулын радъяз Вань удмурт крестьянъёслэсь III-тӥ съездзэс. Отысен ик калык сое бырйиз комиссаре — Центральной комиссариатысь удмуртъёсын герӟаськем ужпумъёсты сэрттӥсе-пертчисе. Ас интые Борисов ӵектэ Иосиф Наговицынэз, ачиз солэн воштӥсез луэ.
Та вакытэ Т. Борисов трос уж лэсьтэ удмуртъёслэсь автономизэс кылдытон понна. 4-тӥ шуркынмонэ 1920-тӥ арын РСФСР-ысь Центральной исполнительной комитет постновление кутӥз Удмурт (Вотской) автономной область кылдытон пумысен. Т а вакытэ ик Т. Борисов ортчытэ: Россиысь дышетон но лулчеберет удысын удмурт ужасъёслэсь I-тӥ съездзэс (1920), Россиысь удмурт нылкышноослэсь I-тӥ конференцизэс (1920),  Россиысь ужась удмурт егитъёслэсь I-тӥ конференцизэс (1921). 1923-тӥ арын Борисовлы Удмуртиысь кошконо луиз. Келяло сое Калмыкие (1923–1924).

Т.Борисовлэн Клара
но Роза нылъёсыз

Т.Борисовлэн Клара но Роза
нылъёсыз

1925-тӥ арын Т.Борисов кышнояське. Кышноез ӟуч вылэм - Александра Морозова. Кык нылъёсыз вордӥсько – Роза но Клара. Али ке но та нылъёс улэпесь на, соос 80 ареслэсь бадӟымгес ни. Клара Трофимовна улэ Северо-двинскын, со атаезлэн пытьыезъя мынэ-мын - эмъясьын ужамын. Роза Трофи-мовна инженерын тыршемын, улэ Украинаын.