XVIII дауре Урал котырын трос пӧртэм заводъёс кылдо: чугунэз, кортэз, медь лэсьтонъя. Чугун поттэмъя Уралысь заводъёс быдэс дуннеын нырысетӥ интые потӥзы. Со вакытэ Ӟуч кун кортсэ Англие вуза вал, Швециен ӵошатскыса. Даурлэн кыкетӥ ӝыныяз Кам котырын кылдӥзы корт но медь поттӥсь заводъёс. Соос пӧлысь бадӟымъёсыз луо: Вотка карысь (1759), Иж карысь (1760). Соосты кылдытон бордын граф П. И. Шувалов но горной инженер А. С. Москвин ужазы. Кортлы чугун Кам шуртӥ Гороблагодатск заводъёсысь келяло вал. Иж но Вотка заводъёсын мастеровой но приписной крестъянъёс ужазы.
Иж завод – Россиысь одbгез бадзым кун завод. Нырысь татын корт лэсьто вал. Бордаз ик интыяськемын посёлок, кытын уло ужасьёсыз. Со пыре вал Кузон губерниысь Вятской провинцие (бjрысь Вятской губерниысь Сарапул уездэ). XVIII даурлэн пумаз заводын ужа вал 350 ӧнерчи, кӧня ке сюрс заводэ гожтэм крестьян ужась (1807-тӥ арысен соос «непременной» шуыса нимасько). Заводын олокӧня пӧртэм корт, сталь-уклад (со юн ӧй вал), якорьёсты но мукет корт арбериосты лэсьтылӥзы.
1807-тӥ арын заводын А. Ф. Дерябин, горной инженер, кивалтэт улсын пыӵал ёзнэт усьтӥськиз. Таин валче завод корт поттӥсь но пыӵал лэсьтӥсь нимаськыны кутскиз. Архитектор С. Е. Дудин 1813-1827-тӥ аръёсы ужаз заводлэн вылтусыз бордын, выль юртъеръёсты пуктӥз: ньыль этажъем корпус, арсенал.
1860-тӥ аръёсысен завод выль пыӵал поттыны кутске – стальлэсь гумыен.
1860-1870-тӥ аръёсы ортчем воштӥськонъёс бере заводысь ужасьёс воляе лэземын вал, мылзы потэмзыя соос выльысен татчы ужаны карисько.
1870-тӥ аръёсы нош ик выль пыxал поттыны кутскизы: Берданлэсь винтовказэ, – соин ик заводлэсь пушсэ, тӥрлыксэ воштыны кулэ луиз. 1873-тӥ арын юн сталь, корт, чугун, пыӵал гумы поттыны кутскизы.
1891-тӥ арысен завод С. И. Мосин капитанлэн винтовкаезлэсь вань модификациоссэ поттӥз.
1900-тӥ арлы заводын туж трос пӧртэм станокъёс сыло вал, соосын ог 11 сюрс мурт ужаз.
Иж заводын поттэм арбериос 1882-тӥ арын Мускоын ортчытэм огъя Россиысь художественно-промышленной адзытонын вылӥ дунъямын вал, 1887-тӥ арын Екатеринбургын – Сибир-Урал тодос-промышленной адзытонын – зарни медален пусъемын, 1889-тӥ арын Парижын огъя дуннеысь адзытонын озьы ик вылӥ дунъямын.
